مواقف وطرائف

النهارده، كنت انا و اصحابى رايحين نتخانق مع عيال كل يوم يمسكو اخو واحد صاحبنا يضربوه، المهم رحنا و ضربناهم و الموضوع خلص، بعد ما سبناهم و مشينا لقينا اخو صاحبنا بيتصل تانى و يقول الحقونى ضربونى تانى، و كان معانا واحد بيعشق المشاكل راح قايل العيال دى لازم تتأدب و جاب كرباج و شومه وقال يلا نروح، واحنا ماشيين قابلنا شويه عيال شكلهم صيع اوى، راحوا جايين علينا وكانو عايزيين ياخدو الكرباج رحنا متخانقين معاهم مفيش دقيقه و لقينا حوالى 20 واحد جايين يضربونا، كلنا علقه موووت،

===================================
النهارده، رحت اجيب عيش زى كل يوم من شركه توزيع عيش اسمها العلا، لقيتهم قالولى ان صاحب الشركه خد فلوس الاشتراكات وفلسع،

======================================================

مره، فى يوم ضافتنى بنت على الفيس بوك، قبلت اضافتها، لقيتها بعتتلى رساله بتقولى: عندك اكونت فيس بوك؟،

=============================

النهارده، كنت قاعد قدام الكمبيوتر كالعاده فجاه لقيت ماما بتناديني بتقولي روح ركب الانبوبه عند الجيران عشان الست قاعده لوحدها ومش هتعرف تركبها، قلتلها حاضر، المهم رحت و ركبت الانبوبه وجيت اجرب عشان لو فيه تسرب ولعت عود كبريت و قربت من الانبوبه لقيت النار مسكت في الانبوبه، طلعت اجري و الست واقفه مش عارفه تعمل ايه، قلتلها اجري مفيش وقت، لقيتها قربت منها و قعدت تطفي فيها لحد ما طفت النار خالص، كان منظري وحش اوى،

============================

مره، كنت رايح الكليه وانا ف كليه حاسبات، كنت لابس محترم عشان كان عندي امتحان شفوي و تسليم مشروع والمفروض اني اسلم المشروع ده علي اسطوانه، ركبت الاتوبيس قعدت جنب راجل كبير ف السن وبنكلم، قالي كشكول محاضراتك ده قولتلو اه قالي وريني بتاخدو ايه، اديته الكشكول وفتحه لقي الاسطوانه، لقيته قام فى وسط الاتوبيس و باعلي صوته و قال هي دي المحاضرات اسطوانه، يا ابني حرام عليك و الست اللي ورايا تقولي يا ابني صحتك، و الراجل يقولى و عامل فيها محترم، و السواق يقول هو ده اللي مبوظ الشباب،
====================

مره, اتعرفت على واحده جميلة اوى فى انترفيو فى شغلانه, المهم خد نمرتها وبقينا نخرج, وفى المره اللى كنت ناوى اقولها انى بحبها وعايز اقابل اهلها واخطبها, قلتلها بحبك قالتلى وانا كمان والدنيا ماشيه حلاوه, لقيت واحد قالى لو سمحت يا استاذ ثانيه وخدنى على جنب خطوطين تلاته كده, وقالى لو عايز مكان الساعه 100 جنيه خلص ورن عليا, المهم مشيتو وشتمتو, وراجع بقى اكمل الحوار معها فسالتنى الراجل كان بيقولك ايه قلتلها مفيش فاصرت رحت قايلها كذا كذا, قالتلى كويس دى فرصه نتعرف على بعض اكتر

=============================================

النهارده، قولت لابويا انى عايز اتقدم و اخطب البنت اللى بحبها، لقيتو بصلي و قالي بس كده؟ و راح شادد الكرسي و حطو فى نص الاوضه، و قالى اقف ع الكرسى و اخطب زى مانتا عايز و انا هسمعك،
----------------------------------------------
النهارده، ماما دخلت عليا الاوضه و انا نايمه و فتحت الشباك و النور و اعدت تصووت و تقول اصحححى، صحيت مفزوعه من النوم قولتلها فيه اااايه؟ قالتلى الساعه 7 قومى بسرعه عشان تلحقى الامتحان، قولتلها امتحان ايه يا ماما انا خلصت كليه السنه اللى فاتت، راحت سكتت دقيقه و قالت شكلى كنت بحلم ارجعى نامى انتى و مشيت
===========================

النهارده، التليفون رن و المفروض كل مره انا اللي برد، لكن ابويا المره ده حب يتفزلك و رد و ياريتو ما رد، راح صاحبي افتكرني ان انا اللي رديت و قال ازيك يا ابن الكلب فا ابويا قاله طب لحظه، و صحاني من النوم قالي كلم صاحبك، بعد ما كلمته دخلت انام، لقيت قلم نزل علي قفايا، قالي انا صاحبك يقولي يا ابن الكلب؟، و حبسني اسبوع و خد كل فلوسي،

=========================
مره، كنت عند واحد صاحبي ساكن في الدور الاخير وكان في كلاب فى السطح، الساعه 12 بفتح الباب علشان اروح بصيت لقيت كلب عمال يعض في الزباله الي في اخر الدور و التاني مسك الكوتشي بتاعي و عمال يعض فيه، واحد منهم طلع يجري عليا رزعت الباب و معرفتش اروح، فنمت عند صاحبي يومها، تاني يوم بعد ما صاحبهم طلعهم تاني و انا مروح لقيت الكوتشي الnike فيه خرم كبير و عليه رياله كلب، و الفرده التانيه فيها فضلات كلاب،

==========================

النهارده، صحيت من الموبايل صاحبتي بتتصل بتصوت و تقولي كباية نسكافيه اتدلقت ع ايدها و بتحرقها، قولتلها معلش حطي عليها ميه ساقعه و دهان حروق، نزلت الشغل في الصيدليه لقيت هارد الكمبيوتر اتحرق، روحت مع صاحب الصيدليه مدينة نصر عشان نجيب حاجات، و انا في الطريق لقيت امي بتتصل و بتقولي اختك هتعمل عمليه بكره، خلصنا و روحنا المهندسين بنجيب سي دي من واحد، ركنت عند جاد عشان ناكل حاجه، لقيت امي بتتصل بتقولى جوز خالتك اتوفي و لازم تروح العزا، لسه بقفل معاها طاااخ في عربيه خبطتني من ورا و انا راكن،

------------------------------------------

مره، كنت فى المدرسه و حاضرين جوه معمل الاحياء بقول ممكن تقفلوا الشباك علشان الجو تراب، لقيت الاستاذه بتقولى انتى ازاى طالبه ثانويه انتى مش فاهمه حاجه قولتها خلاص مش مشكله، قالتى وكمان بتبجحى معايا وياريتك بتعرفى تقرى وتكتبى، بصتلها كده لقيتها بتقولى وكمان مش محترمه اطلعى بره المعمل ومتحضريش لاخر الترم،

----------------------------------------

مره، كان عليا امتحان شهر، و قاعد جنبى واحد قالى انا مش مذاكر ايوتها حاجه وحياة أبوك ساعدنى و اتنين فى الديسك إللى جنبى قالو نفس البؤ، قلتلهم معلش يا جماعة مينفعش، المهم الورق اتوزع و بدأنا نحل، الواد اللى جنبى قاعد مش عارف حاجة و راح مطلع برشام و شغال غش، و المراقب قفشو، و كان ناقص 10 دقائق على الإمتحان، راح الواد و هوا ماشى مسك ورقة الإجابة بتاعتى و قطعها، لقيت المراقب قالى معلش قدامك 10 دقايق عيد كل اللى انت كتبتو تانى بس مش هقدر اديك وقت اكتر،

=========================

مره، و انا صغير كنت بكره مدرس رخم اوى فى المدرسه، المهم ف يوم كنت بصلى ف المسجد مع واحد صحبى و ببص ف المسجد لقيت المدرس بيصلى معانا، المهم خلصت صلاه وخرجت وقفت انا و صاحبى بره المسجد، لقيت شاب جاى يسلم ع صاحبى و وقف معانا، قعدت انا اشتم بقى ف المدرس اياه و اشتم بضمير، لقيت الشاب الى واقف معانا بيقولى ده يبقى ابويا،

-------------------------------------

مره، انا وشويه اصحابى فى المدرسه جايين ننط من على السور، احنا قدام مدرستنا اصلا فى قسم، فطلعنا على السور و اطمنا ان مفيش حد واخد باله راح واحد صاحبى قالى احدف الشنط يلا، روحت حادف الشنط كلها لقيت عسكرى جاى جرى و وراه ييجى 4 امناء شرطه، روحت سايب الشنط بره وانا معايا شنطتى و نزلت تانى جوا المدرسه، اصحابى اتقفشو واتنفخو ضرب، و بعدها بشويه لقيتهم داخلين المدرسه ومعاهم الامناء و بيشاورو عليا و بيقولولهم هوا ده اللى حدف الشنط،

----------------------------------------

مره، واحد صاحبي كان جايب العربيه لسه جديد و مكانش لسه طلع رخصة سواقه المهم قالنا تعالو نخرج نتمشي بيها شويه، كان الكلام ده الساعه 2 بالليل و احنا ماشيين لقينا كمين في الشارع اللي ماشين فيه، المهم كان معانا واحد معاه رخصه فوقف و بدلو الاماكن مع بعض، اول ما وصلنا عند الكمين لقينا الناس اللي واقفين عمالين يعدو العربيات كلها، و جم عندنا و كلهم وقفو قدام العربيه و بعد ما اتفتشنا، الظابط قالنا انتو لو مكنتوش وقفتو وبدلتو مع بعض كنا سيبناكم تعدو،
=========================
مره، كنت قاعد فى كافيه في اسكندريه عالبحر، طلبت كاكاو و أخدت أول شفطه لقيت طعمه متغير، قولت لصاحبي دووق كده، قالي عادي، كملت شرب و انا حاسس ان طعمه متغير بس برده شغال، المهم بعد ما خلصت نص الكبايه كده، لقيت حاجه طريه في بقي، روحت تافف، لقيت نزل صرصار اسود معفن،
==========================
مره، ابويا طلب مني فيلم روكي و انا دورت عليه في النت كله وملقتهوش، اتصلت بصاحبي غاوي افلام المصارعة قلتله، قالي طيب ماشي (المشكلة اني كنت عامل فيه مقلب قبل كده)، رحت جبت منه الفلاشة وظبت القعده لابويا فشار ولب وسوداني وبيبسي، و قلتله يلا هشغل الفيلم، شغلت الفيلم ورحت قعدت جمبه طلع فيلم بورن، ابويا شاف اول دقيقة من الفيلم و كلت قلم علي وشي، لقيت الدنيا ضلمت و قالي يا تيت يابن التيت مفيش خروج و لا كمبيوتر تانى،
------------------
النهارده، بتكلم مع صاحبي عن عيد الاضحى، و لما كانا بنتفرج على الدبح، قالى عارف انا مره كان ابويا بيدبح جاموسه و انا كنت بحبها اوى، و هيا بتدبح بقيت ببصلها و هى تبصلى و تبرقلى و تعيط،
============
مره، فى اول سيكشن لينا واحنا فى سنه تانيه بعد اعدادى (هندسه) وطبعا اعدادى مافيهاش طلبه عشان السنه الفاضيه بتاعت سنه 6، لقيت المعيد داخل و بيقول انتو ان شاء الله 50% منكم هيفضلوا معانا السنه الجايه يعنى هاتسقطو عشان عايزين عدد فى السنين اللى جايه،
--------------
النهارده، واحد جالى بجهازه المحل انزل له نسخه ويندوز و بيقولى السي دي روم مش بيفتح كمان، حاولت فيه كتير مش فتح، فكيته وخلعت بابه الاقى المفترى حاطط 3 اسطوانات فى السي دي روم و كمان واحده منهم محطوطه بالمقلوب،
---------------------
مره، كنت ماشي انا وصاحبي في جامعه قومت مطلع علبه سجاير واديتله سجاره وماشيين لقيت بنت بتنده بتقول يابوب فبصيت ورايا بقولها انا قالت اه، بقولها خير قالتلي ممكن طلب سخيف قولتلها أأمري قالتلي ممكن سجاره انا استغربت فحت قولتلها اتفضلي واديتلها سجاره وولعتلها قالتي شكرا واسفه جدا قولتلها عادي مفيش حاجه قالتلي ممكن طلب تاني قولتلها اتفضلي قالتلي معاك حشيش،
----------------
مره، كنت شغال في شركه خطوط موبيلات بدون ذكر اسماء في خدمه العملاء واتصل بيا واحد صعيدي و مشغلي سرينه بوليس وبيقولي ايوه ياض يا ابن ال ..... انا ابن وزير الداخليه هترجعلي الخط و لا لأ،
----------------------
النهارده، لقيت بنت اعرفها بترن عليه كنت مشغول المهم لما فضيت كلمتها لقيتها بتعيط ومنهاره جداً وبتقولي ازاي مش ترد عليه فأنا قلقت قولتلها يابنتي في ايه القيها تقولي مش قادره انا زعلانه اوي فأنا اقلق زياده يابنتي في ايه اتكلمي انا مش مستحمل من هنا لهنا قالتلي اصل انا كنت بجري ورا القطة بتاعتي من كام يوم واتخبطت في باب الشقة وبعدين اليومين الفاتوا لحظنا القطة بتعمل حاجات غريبه فقولتلها طيب يعني كل دا محتاج عياط قلتلي لا اصل احنا اكتشافنا انها جالها حول في عينها،
+++++++++++++++++++++++++++++++

متجدد